Poet
kabhi kabhi to ye halat bhi ki mohabbat ne
niDhal kar diya mujh ko tiri mohabbat ne
tiri ye pahli mohabbat hai tujh ko kya ma.alum
ghula diya mujhe is aḳhiri mohabbat ne
vo yuun bhi ḳhair se sarma ka chand thi lekin
use ujaal diya aur bhi mohabbat ne
mujhe ḳhuda ne adhura hi chhoḌna tha magar
mujhe bana diya ik shaḳhs ki mohabbat ne
ye tum jo mere liye ḳhvab chhoḌ aa.i ho
tumhen jagaya to hoga miri mohabbat ne
main jis ko pahle pahal dil-lagi samajhta tha
mujhe to maar diya is na.i mohabbat ne
ye apne apne nasibon ki baat hai varna
kisi ko ‘mir’ banaya isi mohabbat ne
ye jism-o-jan ye nam-o-numud hasb-o-nasab
ye saare vahm the izzat to di mohabbat ne
mohabbat aur ibadat men farq to hai naan
so chhin li hai tiri dosti mohabbat ne
Leave a Reply