Aaj Hai Kuchh Sabab Aaj Ki Shab Na Ja

Subhan Asad

aaj hai kuchh sabab aaj ki shab na ja

jaan hai zer-e-lab aaj ki shab na ja

kya pata phir tire vasl ki sa.aten

huun kahan kaise kab aaj ki shab na ja

chand kya phuul kya sham.a kya rang kya

hain pareshan sab aaj ki shab na ja

vaqt ko kaise tartib dete hain log

aa sikha de ye ab aaj ki shab na ja

vo sahar bhi tujhi se sahar thi ‘asad’

shab bhi tum se hai shab aaj ki shab na ja