phuul ḳhushbu chandni mahtab vo
par miri ḳhatir hai koi ḳhvab vo
apni apni uljhanon men yaar gum
ab kahan hai halqa-e-ahbab vo
is qadar betab aḳhir kis liye
ye nahin hai ai dil-e-be-tab vo
bujh gaya kuchh dil bhi ab ke hijr men
aur chehre par kahan hai taab vo
ek sahra ki tarah main tishna-lab
ek naddi ki tarah sairab vo
dushman-e-jan hai magar achchha laga
janta hai kuchh adab adab vo
jagne ka kaam mujh ko saunp kar
dekhta rahta hai mere ḳhvab vo
main huun arzan sahilon ki ret sa
aur koi gauhar-e-nayab vo
duur tak ‘faruq’ tapti ret hai
ab yahan aate nahin sailab vo
Leave a Reply