Wafa Naqvi
kabhi jo dhuup hamare makan men aa jaa.e
to saya-dar shajar bhi amaan men aa jaa.e
main shahzada nahin to faqir hi behtar
kahin to zikr mira dastan men aa jaa.e
main tera naam saliqe se to pukarun magar
ḳhuda-na-ḳhvasta luknat zaban men aa jaa.e
kise Dubona hai aur kis ko paar karna hai
shu.ur itna to ab-e-ravan men aa jaa.e
main ek lamhe ko sadiyon ki zindagi samjhun
mira yaqin jo hisar-e-guman men aa jaa.e
jhulas chuka hai bahut dhuup men badan mera
so us se kahta huun ab sa.eban men aa jaa.e
main apni aql se kuchh aur kaam le lunga
kabhi ye dil bhi mira imtihan men aa jaa.e
safar ki saari aziyyat pe ḳhaak uḌti hai
bhaTak ke koi agar karvan men aa jaa.e
main jis ko raaz batata huun apni ḳhalvat ke
ajab nahin ki saf-e-dushmanan men aa jaa.e
Leave a Reply