Shakeel Azmi
tujh ko sochon to tire jism ki ḳhushbu aa.e
meri ghazlon men alamat ki tarah tu aa.e
main tujhe chheḌ ke ḳhamosh rahun sab bolen
baton baton men koi aisa bhi pahlu aa.e
qarz hai mujh pe bahut raat ki tanha.i ka
mere kamre men koi chand na jugnu aa.e
lag ke soi hai koi raat mire siine se
subah ho jaa.e ki jazbat pe qaabu aa.e
chahta huun ki miri pyaas ka matam yuun ho
phir na is dasht men mujh sa koi aahu aa.e
us ka paikar ka.i qiston men chhape novel sa
kabhi chehra kabhi ankhen kabhi gesu aa.e
phir mujhe vazn kiya jaa.e shahadat ke liye
phir adalat men koi le ke tarazu aa.e
ab ke mausam men ye divar bhi gir jaa.e ‘shakil’
is tarah jism ki buniyad men aansu aa.e
Leave a Reply