maut aa.i mujhe kuche men tire jaane se
niind aa hi ga.i jannat ki hava khane se
huun vo ashiq ki tah-e-qabr main jal jaata huun
sham.a turbat par agar milti hai parvane se
qasd uThne ka qayamat ne kiya to ye kaha
lo ye sar chaḌhne lagi paanv ke Thukrane se
vasl ki shab na kar itna bhi hijab ai zalim
shoḳhiyan tang hain teri tire sharmane se
koi hans hans ke sune aur main ro ro ke kahun
lutf donon ko mile dard ke afsane se
ghuncha chaTka koi gulshan men to laila samjhi
mere majnun ne pukara mujhe virane se
rahe ranj o alam o vahshat o barbadi o yaas
ai junun koi na jaa.e mire virane se
kis ko fursat thi par is tarah men kuchh sher ‘vasim’
kah liye hazrat-e-‘naushad’ ke farmane se
Leave a Reply