Syed Amin Ashraf
ḳhaak ya kahkashan se uThta hai
dard aḳhir kahan se uThta hai
hai ajab ja-e-amn qarya-e-dil
hashr saara jahan se uThta hai
dekh ai ah-e-sakinan-e-zamin
ik ghubar asman se uThta hai
pahle ye ḳhar-o-ḳhas jalata tha
sho.ala ab gulsitan se uThta hai
mas.ala ḳhatir-e-pareshan ka
ḳhvahish-e-ra.egan se uThta hai
ik ḳhala hai jo pur nahin hota
jab koi darmiyan se uThta hai
shahkar-e-suḳhan hai misra-e-‘mir’
kab ye tujh na-tavan se uThta hai
Leave a Reply