naash us ashiq-e-nashad ki uthvane do
ab use zer-e-zamin chain se so jaane do
dil bahal jaae to tanhai ki kulfat bhi mite
shab-e-furqat ki balaon ko to aa jaane do
sainkadon gauhar-e-nayab to paida honge
chand jhale miri ankhon se baras jaane do
be kafan phenk hi dena mire lashe ko magar
kucha-e-pak men mahbub ke mar jaane do
liye baitha huun bayaban men pahlu khali
kya milae hain junun tu ne ye virane do
mai ki hajat na kabhi mujh ko rahi ai saaqi
khuun se labrez hain un ankhon ke paimane do
shama-ru jaan bhi hui dil bhi hua tujh pe fida
jal gae ishq ke hathon se ye parvane do
saath mere dil-e-nashad hai tanha main nahin
aae hain dar pe shah-e-din tire divane do
saath us zulf ke uljhe na hamari qismat
ab ise tum dil-e-sad-chak se suljhane do
hoga pur-nur siyah-khana hamare dil ka
is men tum ghaus-e-khuda ko zara aa jaane do
rah chuka dair-o-kalisa men bahut muddat tak
ai junun su-e-haram ab to mujhe jaane do
un ke fiqron men na aenge ye sachche ashiq
vaaiz aae hain jo samjhane to samjhane do
fakhr hai naaz hai us par to ‘jamila’ mujh ko
tum sag-ku-e-jamali mujhe kahlane do