naya mausam dar aaya dasht men barg-o-samar jaage
zamanon se jo mahv-e-ḳhvab the qalb-o-nazar jaage
na.e harfon ke phulon ko sajaya vaqt ne lab par
na.e harfon ke phulon men na.e kaif-o-asar jaage
vo daur aaya sada zulm-o-sitam ke bhi ḳhilaf uTThi
hamari aur tiri duniya ke arbab-e-hunar jaage
qayamat kucha-o-bazar men yunhi nahin aa.i
ham apne shahr men pahle pas-e-divar-o-dar jaage
siva.e tirgi hadd-e-nazar tak kuchh na tha ‘bedi’
ye ḳhvahish thi ki sinon men tamanna-e-sahar jaage
Leave a Reply