mira qissa bhi aaega vafa ki dastanon men
mujhe mat dhundte rahna jafa ki dastanon men
main bint-e-havva ik din men badal dungi zamane ko
mujhe mat qaid kar naz-o-ada ki dastanon men
nazar-andaz mujh ko kar nahin sakti kabhi duniya
mujhe likkha gaya zehn-e-rasa ki dastanon men
mira dil todne vaale kabhi socha hai ye tu ne
tira hi naam aaega saza ki dastanon men
zara puchho havaon se ki ye kaise moattar hain
mujhe paoge tum bad-e-saba ki dastanon men
mire shanon pe lahrate hue balon ko mat chhedo
miri zulfen bhi shamil hain ghata ki dastanon men
khula rakkha ‘iram’ ne dil ka darvaza tiri khatir
mira hi tazkira hoga vafa ki dastanon men
Leave a Reply