Hain Sau Tarah Ke Rang Har Ek Naqsh-e-Pa Mein dekh

hain sau tarah ke rang har ik naqsh-e-pa men dekh

insan ka husn aina-e-irtiqa men dekh

yuun hi nahin ye bartari-e-nasl-e-admi

guzre hain kaise hadse sai-e-baqa men dekh

sarf-e-nazar hain vaqt ki pinhaiyan tamam

duniya-e-na-rasa miri fikr-e-rasa men dekh

ye raushni to lau hai isi ik charagh ki

tazin-e-dahr zehn ki nash-o-numa men dekh

is karobar jan-o-jasad par nigah daal

hain kaisi kaisi ne.amaten ab-o-hava men dekh

yaan kitne log mar ke amar ho gae na puchh

kya suraten baqa ki hain rah-e-fana men dekh

sun to ḳhiram-e-vaqt men hain kaisi ahaTen

kya rang pur-fishan hain ghubar-e-hava men dekh

‘akbar’ hai ek mahshar-e-ilm-o-ḳhabar dimagh

shor-e-hayat ḳhana-e-bim-o-raja men dekh

Leave a Comment