Ajiz Matvi
har-qadam marhala-e-sabr-o-raza ho jaise
zindagi marka-e-karb-o-bala ho jaise
yuun guzar jaate hain duniya se adam ke raahi
rah men naqsh-e-qadam-e-rah-numa ho jaise
chup hue jaate hain yuun dekh ke surat meri
haal mera mire chehre pe likha ho jaise
is tarah kaaT raha huun main shab-e-roz-o-hayat
har-nafas apne liye ek saza ho jaise
dasht men jalti hain ta-hadd-e-nazar yuun shamen
sar-e-har-ḳhar pe ḳhun-e-shohada ho jaise
rind jhijhke to bala-noshon ne mahsus kiya
mai nahin jaam men ḳhun-e-ghuraba ho jaise
yuun shafaq-rang si hai aaj gulistan ki zamin
barahna-pa koi kanTon pe chala ho jaise
har zaban par mire miTne ke hain charche lekin
un ke nazdik to kuchh bhi na hua ho jaise
aaj is andaz se aai mujhe hichki ‘ajiz’
bhulne vaale ne phir yaad kiya ho jaise
Leave a Reply