Liyaqat Ali Aasim
kya ḳhuub ye ana hai ki kashkol toḌ kar
ab tak khaḌe hue hain vahin haath joḌ kar
mar hi na jaa.e zabt-e-fughan se kahin ye shahr
siine se is ke aah nikalo jhinjhoḌ kar
sunnat hai koi hijrat-e-sani bhala batao
jaata hai koi apne madine ko chhoḌ kar
is ke alava koi hamara nahin yahan
jaao koi ḳhuda ko bula laao dauḌ kar
‘asim’ ye dukh to jhelne paḌte hain ishq men
chadar na ho to sote nahin ḳhaak oḌh kar
Leave a Reply