ahmad-hamesh

Dar-Asl Ye Nazm Likhi Hi Nahin Gai

baaz baten bahut maamuli hoti hain

magar un ke daant puure jivan ko katte rahte hain

ye ek nazm ke darmiyan hua aghaz tha jo ikhtitam tak pahunchne se pahle hi puuri nazm samet gum ho gaya

shayad baaz bahut maamuli baton ke daant ek puuri nazm ke jivan ko musalsal katte rahne ke liye honge

so tumhari nazm gum ho gai ‘hamesh’

so tum bhi gum ho jaao ‘hamesh’

an-dekhi tahdariyon men gum ho jaao ‘hamesh’

is se pahle ki kisi avaz ke daant adam-e-tarik men kaund jaaen

kyuun na tum abhi ye jaan lo ki

maamuli se maamuli baat apne hisse ki avaz se guzar gae na janne vaale ke liye to bazgasht ban jaati hai

magar janne vaale ke liye maut ke daant

varna ye usi ka to saundarya jahan-guzida hai ki

dhuup itni dhuan-dhar gir rahi hai ki bijli ke khambe aur chale gae hain

ab kabhi kuchh nahin sunai de sakega

pahle bhi kya sunai diya hoga

ki ek abhagi samaat ko ek ghante ki nasha guman zarb-e-nadida

ya tiin minute ki sukut-e-khush-gavar thokar par rakh liya hoga

aur kaha gaya ki ab intizar na karna ki ab bahut ho chuka ki nahin chahiye ki jo kabhi chahiye tha

so jis raah par aaj tum udaas maqsum baithe ho

is se tumhare hisse ki koi man-chahi raah to ke nahin milti

vo koi aur zamana raha hoga

varna kahan ki chambal nadi aur kahan us ka paani

aur kabhi kinare se Daala hua purana tanbe ka paisa us ki tah men pada nazar aa raha tha

to vahan ab tak kitni hi hasid sauteli parchhaiyon ka nuzul hua hoga

tumhare ansuon ke sankan ko an-dekhi mitti men daba ke uupar se paat dene ke liye

so gum ho jaao ‘hamesh’

us ki nazar se aur apni nazar se bhi

aisa to kabhi nahin hua hoga

ki agar kisi ne khuda ko nahin dekha

to kya khuda ne bhi kisi ko nahin dekha

ki agar koi khuda se nahin mila

to kya khuda bhi kisi se nahin mila

phir vo kaun hai jo apne jazb ke hissa ki asmani kanghi mol le ke apne sar ke beach

maang kadhta hai

us samay jab us ke gham-dida hisse ki duniya men us ke lutf-e-nadida ki barish ho rahi hoti hai

ya shayad kisi jahan-e-asuda ki ummid men kisi jahan-e-na-asuda se guzarna padta hai

tab vapas le jaane ke liye ayaton se shukr ke ek daane ko samet ke

apni jagah le jaane vaali chiyuntiyon ke jamav se purani yadon men mahfuz rakhi

hathiyon ki qatar se e’tibar-e-adam men zam hona padta hai

bhuul jaao ki tum us ke liye siyah gulu-band men chamakte tiin nagon men se kisi ek nag men bhi shamil ho sakoge

More Poems

Leave a Comment