ye ishq ki hai raah na yuun Dagmaga ke chal
himmat ko apni tol qadam ko jama ke chal
rah-e-vafa hai is men na yuun munh bana ke chal
kanTon ko raund raund ke tu muskura ke chal
sham-e-yaqin ki lau ko zara aur tez kar
zulmat men rahravon ko bhi rasta dikha ke chal
gardish falak ki tez hai raftar teri sust
manzil hai duur apne qadam ab baḌha ke chal
dushman jo dost ke hain vo naraz hain to hon
siine pe zaḳhm un ki jafaon ka kha ke chal
tiron ki baaḌh aane de apne qadam na rok
un ki ḳhushi yahi hai tu ḳhuun men naha ke chal
bahta hai ḳhuun to bahne de bahne ki chiiz hai
qatron se ḳhun-e-surḳh ke gulshan khila ke chal
himmat ke jaam sabr ke miina se nosh kar
naqsh-e-qadam se apne tu rasta bana ke chal
jalta rahe bas us ki tamanna ka ik diya
us ke siva hain jitne diye sab bujha ke chal
ai mir-e-karvan tiri ḳhidmat men arz hai
jo gir rahe hain raah men un ko uTha ke chal
rasta kaThin hai tu hai bahut na-tavan ‘uruj’
sultan-e-ka.enat ko haami bana ke chal
Leave a Reply