Aane Ki paDi Hai Kabhi Jaane Ki paDi Hai

aane kī paḌī hai kabhī jaane kī paḌī hai

is dil ko faqat milne milāne kī paḌī hai

bādal bhī lagātār haiñ chhā.e hue is par

aur chāñd ko sūrat bhī dikhāne kī paḌī hai

lāsheñ bhī paḌī haiñ yahāñ chīḳheñ bhī bahut haiñ

is vaqt bhī logoñ ko ḳhazāne kī paḌī hai

ik baar use maiñ ne faqat jaan kahā thā

ab us se mujhe jaan chhuḌāne kī paḌī hai

vo kal kā shikārī hai use pal kī ḳhabar kyā

jangal meñ use ghaat lagāne kī paḌī hai

sab chor luTere haiñ yahāñ kaun valī hai

aise meñ bhī ‘zebī’ ko zamāne kī paḌī hai

Leave a Comment