Farhat Ehsas
ye dil duniya se baaz aane laga hai
ki ab siine men raaz aane laga hai
azaan hone lagi mehrab-e-jan men
mira vaqt-e-namaz aane laga hai
yuun hi ik zaḳhm par de di thi islah
so ab le kar bayaz aane laga hai
bahut se zaḳhm the ab sirf ik zaḳhm
lahu men irtikaz aane laga hai
bahut ab ho chuki duniya se yaari
udhar se e’tiraz aane laga hai
bahut kaari hai ab ke aql ka vaar
junun ko imtiyaz aane laga hai
Leave a Reply