Jo Zauq Hai Ki Ho Daryaft Aabru-E-Sharab

jo zauq hai ki ho daryaft abru-e-sharab

to chashm-e-jam se ai shaikh dekh su-e-sharab

kabhi to de gul-e-dastar-e-shaikh bu-e-sharab

qaba ki bel men yarab lage kadu-e-sharab

vo mast hain jo hain majruh-e-tegh-e-mauja-e-mai

jigar ke chaak pe ai gul bane subu-e-sharab

jo ashiq-e-lab-e-be-gun-e-yar ho farhad

to be-sutun se bhi jaae shir-e-ju-e-sharab

vo mast hain ki jo tiija pas-e-fana hoga

hamare phuul banenge gul-e-kadu-e-sharab

hamesha mai-kade men khush-qadon ka majmaa hai

hazaron sarv lage hain kinare ju-e-sharab

lagain taak ke us mast ne jo talvaren

dahan-e-zakhm-e-badan se bhi aai bu-e-sharab

Dubo diya mujhe tufan-e-mai ne ai saaqi

amiq-tar qadd-e-amdam se nikle ju-e-sharab

namaz shukr ki padhta hai jaam tod ke shaikh

vazu ke vaste leta hai abru-e-sharab

vo rashk-e-hur mai-e-mushkbu ka khvahan hai

gul-e-bahisht hai mushtaq-e-rang-o-bu-e-sharab

sada-e-qulqul-e-mina se ho gaya sabit

ki pet bhar ke karen mast guftugu-e-sharab

ba-rang-e-shisha-e-mai ab ki fasl-e-barish men

karenge baith ke kashti men sair-e-ju-e-sharab

khula ye shishon ke jhukne se haal ai saaqi

ki sar-kashi nahin lazim hai ru-ba-ru-e-sharab

asir-e-dam-e-alaeq hon kis tarah mai-khvar

ki rassiyon men nahin bandhte subu-e-sharab

na ho jo kisht-e-amal apni sabz ai saaqi

riyaz-e-khuld se ham kaat laaen ju-e-sharab

ilaj-e-zoaf-e-basar nur-e-mai hai maston ko

hamari aankhon ki chashma banegi ju-e-sharab

pata laga ke gaya su-e-gulshan-e-jannat

kahan kahan nahin ki main ne justuju-e-sharab

kisi ne saghar-e-mai se gulon ko di tashbih

nasim-e-bagh se aai jo aaj bu-e-sharab

milenge saghar-o-mina jo khali use saaqi

karenge dida-o-dil apni justuju-e-sharab

kiya jo mai-kashon ne azm-e-sair-e-alam-e-ab

to badle tonbon ke haath aa gai kadu-e-sharab

kharid-e-jins-e-shafaat men hogi kaifiyat

hamari ganth men hai naqd-e-abru-e-sharab

bahak ke ja.un jo masti men janib-e-kausar

to mujh ko dast-e-subu khinch laae su-e-sharab

ye kis ke aane se mai-khana men hui shadi

dulhan ke itr se milti hai aaj bu-e-sharab

badan jo tuut raha hai zuruf-e-mai ke saath

bana hai kya gul-e-adam se har subu-e-sharab

vo rashk-e-mai kare bala-e-bam mai-khvari

ilahi aaj khat-e-kahkahshan ho ju-e-sharab

zuruf-e-bada-e-gul-gun ho mere kandhon par

farishton se bhi main uthva.un har subu-e-sharab

khula ye phulon ke hone se haal ai zahid

pas-e-fana bhi hai rindon ko arzu-e-sharab

suna hai paas masiha ke aftab bhi hai

karenge maut ke hiile se justuju-e-sharab

na ho saki koi taazir-e-mai-kashi sabit

ziyada had se badhi aaj guftugu-e-sharab

gada-e-bada huun ulfat men chashm-e-maigun ke

tire faqir ka tonba bana kadu-e-sharab

huzur-e-dukhtar-e-zar haath paanv kanpte hain

tamam maston ko rasha hai ru-ba-ru-e-sharab

‘munir’ saqi-e-kausar se luun sharab-e-tuhur

kabhi main aankh utha kar na dekhun su-e-sharab

Leave a Comment