tamannaon ki duniya men qadam dharne nahin deti
jo karna chahta huun zindagi karne nahin deti
koi surat nahin hai zindagi se bach nikalne ki
gham-o-alam ke maron ko bhi marne nahin deti
andhera laakh ho mujh ko sahar ki aas rahti hai
yahi vo raushni hai jo mujhe Darne nahin deti
koi mausam ho un zulfon ki ḳhushbu le hi aati hai
hava-e-shauq dil ke zaḳhm ko bharne nahin deti
ḳhuda ne mere andar kya ḳhabar kya chiiz rakh di hai
jo samjhauta mujhe halat se karne nahin deti
mujhe ma.alum hai va.ada nibhana saḳht mushkil hai
miri kam-himmati inkar bhi karne nahin deti
guzarti rau badalti ja rahi hai ek ik shai ko
kisi shai se mujhe ulfat ka dam bharne nahin deti
Leave a Reply