Hum Qatl Ho Gae Nahin Tujhko Khabar Hanuz

ham qatl ho gae nahin tujh ko khabar hanuz

bandhe phire hai ham pe miyan tu kamar hanuz

sau sau tarah ke vasl ne marham rakhe vale

zakhm-e-firaq hain mire vaise hi tar hanuz

kholi thi khvab-e-naz se kis ne ye uth ke zulf

laati hai bu-e-naz nasim-e-sahar hanuz

vaadon pe tere kaam bhi mera hua tamam

baten hi tu banaya kiya yaar par hanuz

jo duudh ka jala ho piye chhachh phunk phunk

huun vasl men pe hijr se hai mujh ko Dar hanuz

bhule se tu ne pyaar ki ik din kahi jo baat

rota huun dil hi dil men use yaad kar hanuz

ujde hazar shahr ‘hasan’ aur phir base

abad par hua na ye dil ka nagar hanuz

Leave a Comment