Sajjad Babar
bante rahe hain dil men ajab gard-bad se
rangon ko aazma na sake e’timad se
ye aur baat aable honTon pe paḌ ga.e
dahliz chuum li hai magar e’tiqad se
barson ki be-zaban thakavaT lipaT ga.i
jab shahr-e-dil men lauT ke aa.e jihad se
sarson ki chandni se barahna daraḳht tak
har shai ki dilkashi nikhar aa.i tazad se
kuchh ḳhush-dahan rafiq kahin biich biich men
mera bhi zikr karte rahe hain inaad se
phir aaj ek shakl tarashi hai soch ki
dil ki gupha men harf ke kachche mavad se
‘sajjad’ koi hiila ki lau de uThe ye dil
dam ghuT raha hai ḳhuun ke is injimad se
Leave a Reply