Bante Rahe Hain Dil Mein Ajab Gard-Baad Se

bante rahe haiñ dil meñ ajab gard-bād se

rañgoñ ko aazmā na sake e’timād se

ye aur baat aable hoñToñ pe paḌ ga.e

dahlīz chuum lī hai magar e’tiqād se

barsoñ kī be-zabān thakāvaT lipaT ga.ī

jab shahr-e-dil meñ lauT ke aa.e jihād se

sarsoñ kī chāñdnī se barahna daraḳht tak

har shai kī dilkashī nikhar aa.ī tazād se

kuchh ḳhush-dahan rafīq kahīñ biich biich meñ

merā bhī zikr karte rahe haiñ inaad se

phir aaj ek shakl tarāshī hai soch kī

dil kī guphā meñ harf ke kachche mavād se

‘sajjād’ koī hiila ki lau de uThe ye dil

dam ghuT rahā hai ḳhuun ke is injimād se

Leave a Comment