taron se mahtab se aur kahkashan se kya
mera vatan zamin hai mujhe asman se kya
TukḌe jigar ke hon ki Tapakta ho ḳhun-e-dil
unvan jo tum nahin to tumhen dastan se kya
jiina jo janta ho taḌap kar tire baghair
is ko tiri gali se tire astan se kya
un ka na samna ho usi men hai afiyat
kya janiye ki nikle hamari zaban se kya
utrega jab ḳhumar vahi honge ranj-o-gham
dil ko sukun milega mai-e-arghavan se kya
ai dil hai kis liye tujhe avargi ka shauq
tu bhi bichhaḌ gaya hai kisi karvan se kya
gham hai shikast ka na ḳhushi fat.h ki ‘falak’
mujh ko amal se kaam hai sud-o-ziyan se kya
Leave a Reply