ḳhayal-o-ḳhvab ki duniya nahin sanjone ka
udhar maang ke rusva na ab ke hone ka
koi to aa.ega surḳhi ka aib batlane
lahu ke daagh bhi chehre se ab na dhone ka
mohabbaton men mohabbat ki koi aas na rakh
ye karobar to paane ka hai na khone ka
bichhaḌte vaqt jo talqin bhi na kar paaya
phir us ki yaad men anchal nahin bhigone ka
lo dekh lo vahi sahil pe aa ke Duube hain
jinhen tha shauq bahut kashtiyan Dubone ka
vo ham ki nindon ko ankhon se duur kar Daala
tumhen ḳhayal raha oḌhne bichhaune ka
Leave a Reply