aaj mahsur hain dimak-zada divaron men
ham bhi shamil the kabhi shahr ke memaron men
aḳhirash haath jala hi liye apne ham ne
jaane kyuun phuul nazar aate the angaron men
ye kisi se na kaha la.al-o-javahar the ham
pattharon ki tarah bikte rahe bazaron men
der tak dastaken deti rahi qismat dar par
aur ham uljhe rahe apne hi pindaron men
zindagi tere adakar the kaise ham bhi
samne aate rahe hain ka.i kirdaron men
vaqt hai kar lo marammat abhi ghar ki ‘betab’
abhi rauzan nahin zahir hue divaron men
Leave a Reply