jin ko tauqir-e-rah-o-rasm-e-vafa yaad nahin
kya gila un se karen jin ko ḳhuda yaad nahin
jaane aa.e bhi the ḳhushbu ke sandese mujh ko
jaane guzri thi dabe paanv saba yaad nahin
aap ne saath nibhane ka kiya tha va.ada
is pe kahte hain vo ham se ba-ḳhuda yaad nahin
na raha sham-e-farozan men bhi vo sho.ala-e-ishq
aur parvanon ko marne ki ada yaad nahin
ek ummid-e-masiha.i bhi aḳhir kab tak
phir na kahna hamen adab-e-vafa yaad nahin
sho.ala-e-gul se fana ho ga.i shabnam ‘anjum’
meri hasti hui kyuun ḳhaak zara yaad nahin
Leave a Reply