ek hi ghar men rakh diye kis ne juda juda charagh
tere liye jala charagh mere liye bujha charagh
ishq-o-talab ki raah men bad-e-havas bhi tez thi
main ne jalaya rat-bhar kar ke ḳhuda ḳhuda charagh
sub.h hui to aftab saari bisat ulaT gaya
raat usi maqam par raunaq-e-bazm tha charagh
vaqt-e-sahar jo puchh le koi to kya bata.unga
taq-e-junun pe rat-bhar kis ke liye jala charagh
kaun tha mere ru-ba-ru alam-e-vajd-o-hal men
kis ki nigah-e-lutf se ban gaya aa.ina charagh
vadi-e-jan men daf.atan kaisi ye raushni hui
kis ki nazar ne kar diye manzar-e-shab men va charagh
koi ḳhabar na la saki jis ki hava-e-tund bhi
rakhte hain is maqam ka saara ata-pata charagh
taḳhti-e-shab pe likh diya vaqt ne ye bhi vaqi.a
zard hava ke samne sina-sipar raha charagh
mujh ko ‘ziya’ vo chahiye ghar jo mira ujaal de
mera na mas.ala qamar mera na mudda.a charagh
Leave a Reply