yak-ba-yak dil se tira jalva-numa ho jaana
vo mira husn ke sho.alon men fana ho jaana
dekh dil ko mire tu ne na agar dekha ho
TuuT kar saaz ka mahrum-e-sada ho jaana
al-aman ki rasan-o-dar se aati hai sada
koi asan hai gunahgar-e-vafa ho jaana
mujh se tark-e-gunah-e-ishq ka tu ahd na le
ki main insan huun mumkin hai ḳhata ho jaana
lazzat-e-ishq ki mazbut huiin buniyaden
aa gaya dard-e-mohabbat ko dava ho jaana
vo girah-bandi-e-taqdir tasavvur men tire
vo tabassum ka tire uqda-kusha ho jaana
jazba-e-ishq ki ye shan-e-talavvun tauba
kabhi dard aur kabhi dast-e-dua ho jaana
‘arzu’ ki qasam ai kucha-e-janan tujh ko
kis se sikha tire zarron ne ḳhuda ho jaana
Leave a Reply