jis ko chalna hai chale raḳht-e-safar bandhe hue
ham jahan-gasht hain uTThe hain kamar bandhe hue
yuun to har gaam ka.i daam hain dasht-e-shab men
ham bhi aa.e hain par-o-bal-e-sahar bandhe hue
su-e-aflak safiran-e-dua jaa.e hain
Dar hai lauT aa.en na zanjir-e-asar bandhe hue
ahl-e-zindan hain abhi muntazir-e-fasl-e-bahar
shaḳh-e-farda se ḳhayal-e-gul-e-tar bandhe hue
dasht-e-imkan men koi saath mira de na saka
kitne rahbar mile dastar-e-ḳhizar bandhe hue
koi aghosh kushada hai na va koi nazar
ya.ani jo dar hai koi parda-e-dar bandhe hue
bujh ga.i sham.a nazar mund ga.iin shab ki ankhen
sub.h ab aa.i hai pushtara-e-zar bandhe hue
ham ‘tamanna.i’ jahan-e-guzaran ki rau men
su-e-shabnam chale ummid-e-sharar bandhe hue
Leave a Reply