Yun Apne Dil Ko Bahlane Lage Hain

yuuñ apne dil ko bahlāne lage haiñ

lipaT kar ḳhud ke hī shāne lage haiñ

hameñ to maut bhī āsāñ nahīñ thī

so ab zinda nazar aane lage haiñ

udāsī is qadar haavī thī ham par

ki ḳhush hone pe itrāne lage haiñ

jo dekhī ik shikārī kī udāsī

parinde lauT kar aane lage haiñ

salīqe se lipaT kar paaoñ se ab

ye ġham zanjīr pahnāne lage haiñ

ġhamoñ kī dhuup baḌhtī jā rahī hai

ḳhushī ke phuul murjhāne lage haiñ

faqat ab chand qadmoñ pe hai manzil

magar ham haiñ ki sustāne lage haiñ

Leave a Comment