yuun apne dil ko bahlane lage hain
lipaT kar ḳhud ke hi shane lage hain
hamen to maut bhi asan nahin thi
so ab zinda nazar aane lage hain
udasi is qadar haavi thi ham par
ki ḳhush hone pe itrane lage hain
jo dekhi ik shikari ki udasi
parinde lauT kar aane lage hain
saliqe se lipaT kar paaon se ab
ye gham zanjir pahnane lage hain
ghamon ki dhuup baḌhti ja rahi hai
ḳhushi ke phuul murjhane lage hain
faqat ab chand qadmon pe hai manzil
magar ham hain ki sustane lage hain
Leave a Reply