Rasheed Lakhnavi
josh-e-vahshat mere talvon ko ye iiza bhi sahi
hain jahan sau aable kuchh ḳhar-e-sahra bhi sahi
dil men sau baten hain ik teri tamanna bhi sahi
sar pe hain laakh afaten ik dagh-e-sauda bhi sahi
munh pe anchal lijiye mujh se jo aata hai hijab
gar yahi manzur hai thoḌa sa parda bhi sahi
dil men vaqt-e-zab.h hai hasrat ki tum ko dekh len
marte marte ḳhair jiine ki tamanna bhi sahi
ham adam se yaan na aate the to samjhata tha dil
ik nazar gulzar-e-hasti ka tamasha bhi sahi
mera hal-e-saḳht-jani sun ke farmane lage
tegh ke saath ek abru ka ishara bhi sahi
garm aahen kar chuka ab khinchta huun sard aah
lijiye ThanDi hava ka ek jhonka bhi sahi
kyuun bigaḌiye husn-o-rif.at men kise inkar hai
aap yusuf bhi sahi rashk-e-masiha bhi sahi
apne dil ko gar pasand aa.e to janen ḳhuub hai
ham ne maana yaar tum se koi achchha bhi sahi
tira-baḳhton ke mazaron par na hogi raushni
aazma dekho charagh-e-dast-e-musa bhi sahi
charasazon ki ḳhushi hai zaḳhm par hon ya na hon
marham-e-zangar ka ek-adh phaha bhi sahi
tere sar se paanv tak barson men jaati hai nazar
har jagah par kahti hai yaan ka tamasha bhi sahi
dil jigar men kuchh nahin siine men hain par aas hai
bazm ki zinat ko ḳhali jam-o-mina bhi sahi
ye to zahir ho gaya tum martabe men ho buland
ab masiha se masiha.i ka da.ava bhi sahi
us ke dar par ja ke kuchh hasil na hoga ai ‘rashid’
koi bola bhi sahi tum ne pukara bhi sahi
Leave a Reply