vaqt-e-ruḳhsat vo aansu bahane lage
dil dukhane ke manzar suhane lage
pursish-e-dard ko jab vo aane lage
zaḳhm-e-dil misl-e-gul muskurane lage
raat pal bhar ko palken jhapakne na diin
subah hote hi ankhen churane lage
aankh bhar aa.i barkha ke paani ki jab
naav kaghaz ki bachche bahane lage
mere aansu the un ki hansi ka sabab
roi shabnam to gul muskurane lage
Leave a Reply