sada ye kis ki hai jo duur se bula.e mujhe
qarib ja.un to kuchh bhi nazar na aa.e mujhe
main bujhte bujhte dhuen ki lakir chhoḌunga
ye bad-e-tund zara soch kar bujha.e mujhe
ghurub ke nahin asar ye to phir kya hain
ki jism se baḌe lagte hain ab to saa.e mujhe
jala ho dhuup men aur ḳhal-o-ḳhad na bigḌe hon
bhare jahan men vo ik shaḳhs to dikha.e mujhe
kisi ke lams se kundan main ho to sakta huun
magar ye shart koi haath to laga.e mujhe
Leave a Reply