Koi Puchhe Mere Mahtab Se Mere Sitaron Se

koi puchhe mire mahtab se mere sitaron se

chhalakta kyuun nahin sailab men paani kinaron se

mukammal ho to sachchai kahan taqsim hoti hai

ye kahna hai mohabbat ke vafa ke hissa-daron se

thahar jaae dar o divar par jab tisra mausam

nahin kuchh farq padta phir khizaon se baharon se

bagule aag ke raqsan rahe ta der sahil par

samundar ka samundar chhup gaya udte shararon se

miri har baat pas-manzar se kyuun mansub hoti hai

mujhe avaz si aati hai kyuun ujde dayaron se

jahan ta-hadd-e-binai musafir hi musafir hon

nishan qadmon ke mit jaate hain aisi rahguzaron se

Leave a Comment