ishq hi tanha nahin shorida-sar mere liye
husn bhi betab hai aur kis qadar mere liye
haan mubarak ab hai mearaj-e-nazar mere liye
jis qadar vo dur-tar nazdik-tar mere liye
khel hai bazicha-e-sham-o-sahar mere liye
do gul-e-bazi hain ye shams o qamar mere liye
vaqf hai sayyad ki ik ik nazar mere liye
haan mubarak ye shikast-e-bal-o-par mere liye
garm hai hangama-e-sham-o-sahar mere liye
raat din gardish men hain shams o qamar mere liye
main huun vahshi aah kis sahra-e-afat-khez ka
hai gul-e-virana bhi begana-tar mere liye
us maqam-e-ishq men huun marhaba ai be-khudi
zarra zarra hai jahan garm-e-safar mere liye
jazb ho kar rah gaya huun main jamal-e-dost men
ishq hai tabinda-tar painda-tar mere liye
main nahin kahta ki main huun tu ho teri khalvaten
haan magar sab se juda khaas ik nazar mere liye
allah allah main bhi kya nazuk-dimagh-e-ishq huun
nikhat-e-gul bhi hai vajh-e-dard-e-sar mere liye
phir bhi ankhen dhundhti hain ik sarapa naaz ko
main ne maana kuchh nahin hadd-e-nazar mere liye
rah-rav-e-rah-e-talab ko khizr ki hajat nahin
zarra zarra hai charagh-e-rah-guzar mere liye
apne dil men juz tire main bhi sama sakta nahin
mera har har saans hai zanjir-e-dar mere liye
mujh ko jannat hi jo duniya hai to ya-rab bakhsh de
bas yahi daman-e-tar chashman-e-tar mere liye
tark-e-mai se aur bhi main to sharabi ban gaya
roz aa jaata hai mina-e-sahar mere liye
jis ne zahid se bhi kafir ke uda daale hain hosh
us se bhi kuchh aur saaqi tez-tar mere liye
vo mira saghar-ba-kaf hona pashemani ke saath
abr-e-rahmat ka vo uthna jhuum kar mere liye
kal shab-e-mahtab men ik bulbul-e-afat-nava
markaz-e-gham ban raha tha raat bhar mere liye
na-gahan lab-ha-e-barg-e-gul se ye aai nida
naale karta hai abas ai be-khabar mere liye
main bhi huun apni jagah khunin-jigar khunin-kafan
tu na apni jaan kho ai musht-e-par mere liye
bas ye sunna tha ki pa-e-gul pe gir kar mar mita
ban gaya ik naqsh-e-ibrat umr bhar mere liye
zindagi ik tohmat-e-beja hai meri zaat par
maut ik ilzam-e-na-jaez ‘jigar’ mere liye
main to har halat men khush huun lekin us ka kya ilaaj
dabdaba aati hain vo ankhen ‘jigar’ mere liye
Leave a Reply