Kaha Ye Maine Ki Apni Aankhon Mein KHwab Rakhna

Munir Anwar

kaha ye main ne ki apni ankhon men ḳhvab rakhna

kaha ye us ne ki aankh rakhna azaab rakhna

ye main ne puchha tha log kyuun mar rahe hain itne

javab aaya tum un ke ḳhuun ka hisab rakhna

kaha ye main ne zamin par amn ho sakega

kaha ki hathon men alam rakhna kitab rakhna

kaha ye main ne ki zindagi kis tarah kaTegi

kaha ye us ne ki chahatin be-hisab rakhna

kaha ye main ne hava.en hain tund-o-tez kitni

vo hans ke boli ki kashtiyan zer-e-ab rakhna

kaha ye us ne ki da.ere se nikal ke dekhen

kaha ki pahle koi safar intiḳhab rakhna

kaha ye us ne ki bhiiḌ men ham bichhaḌ na jaa.en

kaha ki juuḌe men ek taaza gulab rakhna

kaha ye us ne ki ham agar sach ka saath den to

kaha ye main ne ki sahne ki taab rakhna