sitare jab kisi mahtab ka qissa sunate hain
mire ḳhvabon ke angan men ujale muskurate hain
haqiqat samne laane se jab daman bachate hain
to gir kar aa.ine hathon se ḳhud hi TuuT jaate hain
hamen to muskurane ke siva kuchh bhi nahin aata
hujum-e-gham men bhi ham log yuun hi muskurate hain
chalo ai bada-ḳhvaro chal ke un ki ḳhairiyat puchhen
suna hai shaiḳh sahab mai-kade men paa.e jaate hain
mohabbat men nadamat ke siva kuchh bhi nahin paaya
magar phir bhi mohabbat se kahan ham baaz aate hain
tum hi ruThe hue ho jab hamare dil ki duniya se
chalo phir ham bhi apni zindagi se ruuTh jaate hain
yahi hai farq zahid aur ashiq ki ibadat men
ye apna sar jhukata hai vo apna dil jhukate hain
miri ummid aksar chahti hai surḳh-ru hona
magar halat aksar mujh ko a.ina dikhate hain
Leave a Reply