tabi.at bujh ga.i jab se tire didar ko tarse
agar ab niind bhi aati hai uTh jaate hain bistar se
hamen ma.ashuq ko apna banana tak nahin aata
banane vaale a.ina bana lete hain patthar se
zaban se aah nikli dil se naala ankhon se aansu
magar ik teri dhun hai jo nikalti hi nahin sar se
are nadan sachcha chahne vaala nahin milta
vo laila thi ki jis ko mil gaya majnun muqaddar se
milan-sari bhi sikho jab nigah-e-naz paa.i hai
miri jaan aadmi aḳhlaq se talvar jauhar se
ḳhuda ki shaan matlab-ashna aise bhi hote hain
buton ne ban ke but sajda karaya pahle but-gar se
safi’ ko muskura kar dekh lo ghusse se kya hasil
use tum zahr kyon dete ho jo marta hai shakkar se
Leave a Reply