Jafar Shirazi
ji larazta hai umaDti hui tanha.i se
ab nikalo mujhe us raat ki pahna.i se
aa.i yadon ki hava ghulne laga kaan men zahr
bujh ga.i shaam bhi bajti hui shahna.i se
puchhta phirta huun galiyon ke ujaḌne ka sabab
har taraf jam.a hain kya log tamasha.i se
samne phaila hua dasht ka sannaTa hai
ab kahan bach ke chalen ham dil-e-sauda.i se
ban gaya ek qayamat dar-e-dil tak aana
aur guzarna hai abhi dhyan ki angna.i se
kis tarah apna bana.en use ham ai ‘ja.afar’
baat aage na baḌhi jis ki shanasa.i se
Leave a Reply