Shadab Anjum
na vo dil-dada-e-lutf-o-karam hai
na us men ḳhvahish-e-jah-o-hasham hai
mo.attal ho gaya hai ik fariza
muqaffal chand hafton se haram hai
piyala zahr ka hai zindagi ye
magar lagta hai jaise jam-e-jam hai
bahut lagta hai ik chhoTa sa gham bhi
ḳhushi jitni mile utni hi kam hai
main kaise duur kar duun us ko ḳhud se
ye saaya hi to mera ham-qadam hai
jo ḳhud muhtaj hai kya us se mangun
na hoga rab jo patthar ka sanam hai
nikalo is ko apne dil se ‘anjum’
ki ye arman hi baba-e-gham hai
Leave a Reply