Khawaja Javed Akhtar
na.i zamin naya asman banate hain
ham apne vaste apna jahan banate hain
bujhi bujhi si vo tasvir-e-jan banate hain
kahin charagh kahin par dhuan banate hain
bayan karte hain ham dastan lafzon men
zara si baat ki vo dastan banate hain
chamakti dhuup men kirnen sameTte hain ham
unhin ko taan ke phir sa.eban banate hain
sukun-e-dil ke liye ham bhi roz kaghaz ke
kabhi to phuul kabhi titliyan banate hain
jo madd-o-jazr se vaqif nahin hain dariya ke
vo sahilon pe hi aksar makan banate hain
banate rahte hain ‘javed’ kashtiyan lekin
ham un ke vaste phir badban banate hain
Leave a Reply