qurbat baḌha baḌha kar be-ḳhud bana rahe hain
main duur haT raha huun vo paas aa rahe hain
e.ajaz-e-pak-bazi hairat men la rahe hain
dil mil gaya hai dil se pahlu juda rahe hain
vo dil se gham bhula kar dil ko lubha rahe hain
guzre hue zamane phir phir ke aa rahe hain
siine men zabt-e-gham se chhala ubhar raha hai
sho.ale ko band kar ke paani bana rahe hain
ma.ani na puchh zalim is uzr-e-be-gunah ke
apne ko avval de kar tujh ko bacha rahe hain
ai be-ḳhudi kahan hai jaldi miri ḳhabar le
bhule the jo ba-mushkil phir yaad aa rahe hain
len kaam zabt se kya ulTa hai dil ka phoḌa
utna ubhar raha hai jitna daba rahe hain
furqat men saz-e-rahat saman azaab ka hai
ThanDi hava ke jhonke kya ji jala rahe hain
hain husn ke karishme kya inqalab-agin
gham-ḳhvar jo the kal tak ab ḳhaar kha rahe hain
ḳhud in ki justuju men ham duur bhage varna
vo kab alag rahe hain vo kab juda rahe hain
le le ke ThanDi sansen puchho na haal dekho
tum bhed kholte ho aur ham chhupa rahe hain
dekh ‘arzu’ ye rona shana hila hila kar
tu aaj ḳhvab men hai aur vo jaga rahe hain
Leave a Reply