Aur Kis Ka Ghar Kushada Hai Kahan Thahregi Raat

aur kis ka ghar kushada hai kahan thahregi raat

mujh ko hi mehman-navazi ka sharaf bakhshegi raat

niind aaegi na un be-khvab ankhon men kabhi

mujh ko thapki dete dete aap so jaegi raat

shaam hargiz din ke siine men na khanjar ghonpti

ye agar malum hota khun-baha mangegi raat

ansuon se tar-ba-tar ho jaega angan tamam

karb-e-tanhai pe apne phuut kar roegi raat

chand-taron ko chhupa bhi len ghane badal agar

jhilmilate jugnuon se rasta puchhegi raat

apne apne lutf se donon navazenge mujhe

zakhm-e-dil bakhshega din us par namak chhidkegi raat

suraj apne rath ko phir akash par daudaega

sub.h ka taara nikalte hi simat jaegi raat

jab tire juude ka gajra yaad aaega mujhe

rat-ki-rani ke phulon se mahak uthegi raat

ghar palat kar jaunga rukh par liye din-bhar ki dhuul

mujh ko ai ‘abid’ badi mushkil se pahchanegi raat

Leave a Comment