din men bhi hasrat-e-mahtab liye phirte hain
haa.e kya log hain kya ḳhvab liye phirte hain
ham kahan manzar-e-shadab liye phirte hain
dar-ba-dar dida-e-ḳhun-nab liye phirte hain
vo qayamat se to pahle nahin milne vaala
kis liye phir dil-e-betab liye phirte hain
ham se tahzib ka daman nahin chhoḌa jaata
dasht-e-vahshat men bhi adab liye phirte hain
saltanat haath se jaati rahi lekin ham log
chand baḳhshe hue alqab liye phirte hain
ek din hona hai miTTi ka nivala phir bhi
jism par atlas-o-kamḳhvab liye phirte hain
ham-nava.i kahan hasil hai kisi ki mujh ko
ham-navaon ko to ahbab liye phirte hain
kis liye log hamen sar pe biTha.enge faragh
ham kahan ke par-e-surḳhab liye phirte hain
Leave a Reply