main sochta huun agar is taraf vo aa jaata
charagh-e-umr ki lau ik zara badha jaata
ajiib bhul-bhulayyan hai rasta dil ka
yahan to khizr bhi hota to dagmaga jaata
so apne haath se diin bhi gaya hai duniya bhi
ki ik sire ko pakadte to dusra jaata
magar nahin hai vo masruf-e-naz itna bhi
kabhi kabhi to koi rabta kiya jaata
kabhi vo paas bulata to ye dil-e-durvesh
bas ik ishara-e-abru pe jhumta jaata
palat raha huun usi yar-e-mehrban ki taraf
ab is qadar bhi nahin bevafa hua jaata
palat gaya inhin qadmon se ‘aftab-husain’
kahan talak vahi halat dekhta jaata
Leave a Reply