bahut nahif hai tarz-e-fughan badal Daalo
nizam-e-dahr ko naghma-giran badal Daalo
dil-girafta tanavvo hai zindagi ka usuul
makan ka zikr to kya la-makan badal Daalo
na koi chiiz davami na koi shai mahfuz
yaqin sambhal ke rakkho guman badal Daalo
naya banaya hai dastur-e-ashiqi ham ne
jo tum bhi qa.eda-e-dil-baran badal Daalo
agar ye taḳhta-e-gul zahar hai nazar ke liye
to phir mulazamat-e-gulistan badal Daalo
jo ek pal ke liye ḳhud badal nahin sakte
ye kah rahe hain ki saara jahan badal Daalo
tumhara kya hai musibat hai likhne valon ki
jo de chuke ho vo saare bayan badal Daalo
mujhe bataya hai ‘sayyad’ ne nusḳha-e-asan
jo tang ho to zamin asman badal Daalo
Leave a Reply