insha-allah-khan-insha

Hai Mujhko Rabt Bas-Ki Ghazalan-E-Ram Ke Sath

hai mujh ko rabt bas-ki ghazalan-e-ram ke saath

chaukun huun dekh saae ko apne qadam ke saath

hai zat-e-haq javahir o aghraz se bari

tashbih kya hai us ko vajud o adam ke saath

kya ain o mulk o vaza o izafat ka dakhl vaan

hai infial o fel mata kaif-o-kam ke saath

dekha main saath Dhol ke suuli par un ka sar

fakhriyya vo jo phirte the tabl-o-alam ke saath

dekhi ye chaah un ki andhere kuen ke biich

phenka lapet kushte ko apne gulam ke saath

ku-e-butan se tauf-e-haram ko chale to ham

lekin kamal-e-hasrat o hirman o gham ke saath

thiin apni ankhen halqa-e-zanjir ki namat

paivasta hil rahi dar-e-baitus-sanam ke saath

kahte ho vuun se hoke idhar aao vuun chalen

kya khuub kyuun na daud padun aise dam ke saath

tum aur baat maano aji sab nazar men hai

danton tale zaban dabani qasam ke saath

ab chhed chhad ki ghazal ‘insha’ ik aur likh

hain laakh shokhiyan tiri nok-e-qalam ke saath

More Poems

Leave a Comment