ye kya tahrir pagal likh raha hai
har ik pyase ko badal likh raha hai
na ro gustaḳh beTe ke amal par
tira guzra hua kal likh raha hai
paḌho har mauj aayat ki tarah hai
vo dariya par musalsal likh raha hai
thame paani ko tabdili mubarak
hava ka haath halchal likh raha hai
tujhe chhuna nirala tajraba tha
vo jhuTa hai jo maḳhmal likh raha hai
bana kar shahr ka naqsha vo bachcha
baḌe harfon men jangal likh raha hai
ḳhuda-e-amn jo kahta hai ḳhud ko
zamin par ḳhud hi maqtal likh raha hai
Leave a Reply