Khwaja Shauq
masafat zindagi aur hadson men itni mub.ham hai
ḳhushi kahte hain jis ko ik zara sa vaqfa-e-gham hai
bahar-e-husn pinhan hai junun tahrik-e-alam hai
jahan ham hain vahan gunja.ish-e-fikr-o-nazar kam hai
nigah-e-vaqt men donon bhi shanen paa.i jaati hain
kahin zaḳhm-e-jigar hai aur kahin zaḳhmon ka marham hai
mazaq-e-am se kya mutma.in honge nazar vaale
shu.ur-e-shadmani tak nahin hai gham to phir gham hai
machate hain tabahi pahle phir taskin dete hain
musalsal ham pe ehsan gulsitan valon ka kya kam hai
vahi dil ka lahu hai ashk kahiye ya hansi kahiye
bhaḌak uTThe to sho.ala narm paḌ jaa.e to shabnam hai
ba-qaid-e-hosh to vo hain rag-e-jan ke qarin lekin
talab hadd-e-junun men ho to ye bhi fasla kam hai
chhupa leti hai ḳhush-poshi bhi kya kya zaḳhm daman men
sada-e-ḳhanda-e-gul ek fariyad-e-munazzam hai
mizaj-e-dahr kya un ki nazar ko dekh kar chup huun
mujhe malum hai halat men jitna bhi dam-ḳham hai
payam-e-dost sunne gosh-bar-avaz rahta huun
dhaḌakta dil nahin pahlu men jiita jagta gham hai
vo kaise log hain yarab jo mar kar bhi nahin marte
yahan to zindagi men zindagi ka sha.iba kam hai
ajab aalam hai ‘shauq’ ehsas-e-gham ki pasdari ka
ba-zahir ḳhushk hain ankhen magar daman-e-dil nam hai
Leave a Reply