pahle to miTTi ka aur paani ka andaza hua
phir kahin apni pareshani ka andaza hua
ai mohabbat tere dukh se dosti asan na thi
tujh sa ho kar teri virani ka andaza hua
umr bhar ham ne fana ke tajrbe ḳhud par kiye
umr bhar men alam-e-fani ka andaza hua
ik zamane tak badan bin ḳhvab bin adab the
phir achanak apni uryani ka andaza hua
tere hathon jal uThe ham tere hathon jal bujhe
hote hote aag aur paani ka andaza hua
log meri band ankhon men se guzre tab unhen
apni apni ḳhvab-samani ka andaza hava
ek ghera vaqt ka hai dusra na-vaqt ka
ḳhud-nigar kuchh apni nigarani ka andaza hua
suraten bigḌin to apni halaton men aa.e ham
aa.ina TuuTa to hairani ka andaza hua
raat ik dahliz aisi aa ga.i thi ḳhvab men
raat kuchh kuchh apni peshani ka andaza hua
Leave a Reply