Munawwar Lakhnavi
ye itni barhami kyuun hai ye mujh se bad-guman kyuun ho
jo main tum ko sunata huun vo meri dastan kyuun ho
ilahi ḳhair kya koi musibat aane vaali hai
jo ik duniya se khinchta ho vo mujh par mehrban kyuun ho
miri ghairat ye ḳhud-ara.i gavara kar nahin sakti
na jo mera ḳhuda ho vo ḳhuda-e-do-jahan kyuun ho
ruḳh-e-giti ka ghaza ḳhaak hai in ḳhush-nihadon ki
vajud-e-ahl-e-dil ahl-e-zamana par garan kyuun ho
zamana lamha lamha kaam aata hai zamane ke
‘munavar’ umr ik meri hi umr-e-ra.egan kyuun ho
Leave a Reply